ARANZIBIA DORREA Madalena auzoa 28
BERRIATU

Egile ezezaguna. 1500 ing. eta 1600 ing.


Erdi Aroaren amaieran, Aranzibiatarren familia borrokazalea Artibai ibaiaren beheko aldean ziren leinu guztiei gailendu zitzaien. Ondarroako hiribilduraino zabaldu zuen bere boterea, eta inguruko hainbat elizaren jabe egin zen. Aranzibiatarrek leinuari izena eman zion ibai-ibi arantzatsuan eraiki zuten beren dorretxea. Prisma bertikal sendoa da. Nekazaritza-eranskinek eta XVII. mendetik hormari itsatsita dagoen eskailera handi batek dorrearen zati bat ezkutatzen dute. Harlanduskoz egindako horma latzek eta horman sartu gabeko zutabe sendo zakarrez osatutako eskeletoak etxeko hiru solairuei eusten zieten. Beheko solairua biltegi gisa erabiltzen zuten, bigarrenean familiaren gelak zeuden eta azken solairua leinuaren ordezkaritza-ekitaldietarako areto irekia zen. Estalkiaren egungo egitura geroagoko lana da.

 

LEKOIA BEKOA BASERRIA Milloi auzoa 3

Egile ezezaguna. 1570 ing. eta 1780 ing.


Bizkaiko baserriak oso kalitate handiko eraikinak dira berez. Bada, Lekoia Bekoak dituen berezitasun arkitektonikoek maila guztiak gainditzen dituzte. Eraikin hibrido bitxi hau nekazaritza eta abeltzaintzako ustiategien eta aitonen semeen jauregitxoen nahastea da. Baserri tradizionaletan ohikoa den oinplanoko antolamendua proposatzen du, baina erreferentzia kultuz jositako fatxada dauka: moldurazko arku manierista ataripeko sarreran, idibegi barrokoak sukaldea eta ganbara aireztatzeko, eta erlaitz klasizistak solairu nagusiko baoen gainean. Baserrira iristeko, Ondarroarako bidea hartu eta, zubiaren parean, ezkerretara jo behar da auzo-errepide batetik. Errepide horretatik jarraitu behar da, mendian gora beti.

 

ETXE PINTXO Erribera auzoa 41

Egile ezezaguna. 1790 ing.


San Pedro Berriatukoren antzinako apaizetxea etxetzar kubiko arrunta da. Fatxada irudiduna da etxearen
berezitasun bakarra. Fatxada horretan, freskoz eta tenperaz pintatuako lau hormirudi handi daude, zeinetan pertsonaia aristokratikoen inguruko istorio bizidunak ageri baitira (dueluak, zaldi gaineko ibilaldiak, jaunaren harrera-gela...)