IZURTZAKO ERAIKIN-MULTZOA
IZIURTZA

 

 

 


Durangotik iritsita, Izurtzako sarreran bertan, Bekotorre aurituko dugu errepidearen eskuineko aldean. Goiko alderik gabeko dorre hau, Etxaburu leinuari lotua, egoera penagarrian dago. Errepidearen ezkerraldean, berriz, San Nikolas eliza dago. Bolumen garbia da, barruan estilo mudejarrari jarraituz eraikitako zurezko korua duena. Herrian bertan, Arana jauregi bitxia dago, gainerako eraikinen aldean deigarri gertatzen dena 1854an Frantziako hotelen irudira berreraiki zutelako.

Eraikinik ezagunena Etxaburu dorrea da. Ortuzar auzoan dago. Durango-Urkiola errepidea hartu eta, Maņariko udalerriarekiko mugara iritsita, eskuinetara doan bide batean aurkituko dugu. Agirietan jasota dagoenez, XVI. mendearen hasieran hainbat lan egin ziren Estibalitz Etxabururentzat eta Santxo Ibarguenentzat. Hala oinarrian duen harkaiztiaren gaineko bertikaltasun nabariak nola gezileihoek hasiera batean babes-eraikina izan zela salatzen dute. Gerora, sarrerari erantsitako bolumenak eta zurezko gainalde eta akaberek dorrearen itxura samurtu eta etxe-kutsu erromantikoa eman zioten. Horiek guztiak Joseba Rementeriak 1988an egindako berritze-lanen emaitza dira. Errepidera itzulita, eta hara iritsi aurretik, XVIII. mendeko baserri bi aurkituko ditugu, atarian harlanduzko arku barroko bana dutenak.